Соңғы уақытта жалпы білім беретін мектептерде білім алушылар тілінің жұтаңдығы, көркем, образды сөйлей алмау, өз пікірін толықтай жеткізе алмау мәселелерін жиі кездестіреміз. Бұл арада қазақ тілі бойынша білім беруде тілдің лексикалық-грамматикалық құрылымын үйретіп қана қоймай, өз бетінше ізденуге, сындарлы ойлауға, өз ойын, алынған ақпаратты сауатты көркем жеткізуге дағдыландыратын тілдік құралдарды меңгерту талабы айқын көрінеді. Қазақ тіліндегі көріктеуіш тілдік құралдар – ұлт тілінің аса маңызды бөлігі, оны сақтап, ұрпақтан-ұрпаққа жеткізу үшін әсіресе орта білім беру жүйесінде көріктеуіш құралдарды оқытудың, танытудың арнайы әдістемелік бағдарламалары жетілдірілуі тиіс. Мақалада орта мектептің қазақ тілі мен әдебиеті оқулықтарындағы тілдік құралдардың қамтылуына талдау жасалып, оларды игертуде қолданылатын әдістемелік әдістер қарастырылады. Тілдік құралдарды меңгерту арқылы қалыптасатын лингвомәдени құзыреттіліктің теориялық негіздемесі айқындалған.