Бұл мақала мектептің оқу бағдарламаларында географияны оқыту кезінде экологиялық білім беру бағытындағы әлемдік тәжірибеге жүргізілген салыстырмалы талдауды қарастырады. Мектеп географиясындағы экологиялық білім – оқушылардың экологиялық сауаттылығын қалыптастырудың негізгі алғышарты. Мақалада қамтылған зерттеудің мақсаты – мектеп оқушылары арасындағы экологиялық мәселелер туралы хабардарлықты арттыру үшін әр түрлі елдер қолданатын сәтті стратегиялар мен әдістерді анықтау; жинақталған деректерді біріктіру арқылы оқу бағдарламаларын және нәтижелерін бағалау; қазақстандық білім беру жүйесіне бейімделіп, енгізілуі мүмкін табысты экологиялық білім берудің негізгі аспектілерін анықтау. Мақаланың негізгі бөлімі экология тақырыбын оқытудың интерактивті және практикалық әдістерін сәтті қолдану сынды экологиялық білім мен тәрбие берудің аспектілерін қарастырады. Әр түрлі елдердегі, соның ішінде Жапониядағы, Еуропадағы, Солтүстік Америкадағы және басқа аймақтардағы осындай тәсілдердің тиімділігін салыстырмалы талдауға ерекше назар аударылады. Зерттеу оқушылардың адам мен табиғат арасындағы қарым-қатынас туралы түсінігін қалыптастыру үшін экологиялық аспектілерді білім беру бағдарламаларына біріктірудің маңыздылығын көрсетеді. Зерттеу нәтижелері Қазақстанның мектеп географиясын оқыту контекстінде экологиялық білім беруді жақсарту үшін практикалық нұсқаулар береді, бұл экологиялық мәселелер мен оқушылардың тұрақты даму мақсаттарын жүзеге асыруды тереңірек түсінуіне ықпал етеді.