Қашықтықтан оқыту технологияларының дамуы мен цифрлық білім беру ресурстарының қолданылуы - сапалы білім алу мүмкіндігін арттырады. Цифрлық трансформация жоғары білім берудің маңызды аспектісі болып табылады. Білім беру цифровизациясының маңызды ерекшеліктерінің бірі жекелендірілген-нәтижелі білім беру процесіне ауысу болады. Көптеген ғалымдар жекелендірілген-нәтижелі білім беру процесінің негізгі бағыттарының бірі ретінде жаппай ашық онлайн курстарды пайдалануды анықтайды.
Мақалада зерттеу тақырыбы бойынша жазылған әдебиеттерге жүйелі талдау мен І.Жансүгіров атындағы Жетісу университеті оқытушыларының сауалнама нәтижелері негізінде жаппай ашық онлайн курстарды пайдаланудың артықшылықтары мен кемшіліктері қарастырылған. Elibrary базасында іздеу кілт сөздер бойынша жүргізілді. Таңдау критерийлерінің негізінде талданатын мақалалар тізімі 15-ке дейін қысқартылды. Зерттеу мақсатына сәйкес таңдалған 15 мақала жан-жақты талданды. Зерттеу нәтижелері заманауи цифрлық білім беру ортасын құру контекстінде жаппай ашық онлайн курстарды енгізу мәселелерін тереңірек зерттеу үшін пайдаланылуы мүмкін.