Жоғары білім беру жүйесінде дәстүрлі бағалау тәжірибелері көбінесе нәтижелерге басымдық беріп, оқыту үдерісін, рефлексивтік және кәсіби құзыреттердің дамуын елемейді. Мұндай шектеулер оқу жетістіктерін шынайы әрі үдеріс-бағдарлы тұрғыдан бағалаудың қажеттілігін туындатады. Осы зерттеудің мақсаты – Қазақстандағы университеттегі Шет тілі мұғалімінің кәсіби қызметінің лингводидактикалық негіздері пәнінде портфолио арқылы бағалаудың тиімділігін анықтау, сондай-ақ портфолионың студенттердің оқу белсенділігіне, рефлексивтік дағдыларына және теорияны оқыту тәжірибесіне кіріктіруіне ықпалын зерделеу. Зерттеу сапалық жағдайлық зерттеу (case study) үлгісінде, сипаттамалық сандық талдаумен толықтырылып жүргізілді. Қатысушылар – 28 бакалавр студенті мен екі оқытушы. Мәліметтер жартылай құрылымданған сұхбаттардан, портфолио артефактыларынан және рубрикаға негізделген бағалау нәтижелерінен жиналды. Тақырыптық талдау төрт негізгі нәтижені көрсетті: (1) оқу үдерісіне тартылу мен иелік ету деңгейінің артуы, (2) рефлексивтік және метатанымдық дағдылардың дамуы, (3) теориялық білімді оқыту тәжірибесінде шынайы қолдану, (4) уақытты басқару мен жұмыс жүктемесіне байланысты қиындықтар. Сандық талдау қорытындысы бойынша портфолио бағалары 64%-дан 98%-ға дейін (M = 86%, SD = 8.2) ауытқыды; ең жоғары көрсеткіш – оқу материалдарын әзірлеуде, ал ең төмені – оқушыларды бақылау және бағалауда байқалды. Зерттеудің негізгі қорытындысы: портфолио арқылы бағалау оқу нәтижелері мен құзыреттер арасындағы конструктивтік сәйкестікті қамтамасыз етіп, педагогикалық пайымдауды дамытады және кәсіби жетілуді қолдайды. Сонымен бірге, рефлексия тереңдігінің өзгермелілігі мен оқытушының жұмыс жүктемесі қосымша әдістемелік сүйемелдеудің қажеттілігін айқындайды. Жалпы алғанда, зерттеу нәтижелері құрылымдалған, өлшемшартқа негізделген портфолио мұғалімдерді даярлау үдерісінде шынайы бағалаудың пәрменді әрі кешенді құралы екенін дәлелдейді.