Мақалада қазақ тілін оқыту мысалында тілдік білім беруде жасанды интеллект (ЖИ) генеративті технология-ларын қолданудың тиімділігіне кешенді талдау ұсынылған. ЖИ-ді әзірлеуде ағылшын тілінің үстемдігі әлемнің көптеген тілдері үшін цифрлық шеттету қаупін туғызған жағдайда, Қазақстан егеменді ұлттық ЖИ-экожүйесін құруға стратегиялық көзқарасын көрсетеді.

Зерттеу осы экожүйенің барлық деңгейлерін қамтиды: Kaz-LLM үлкен тіл моделі (LLM) сияқты іргелі әзірлемелерден бастап, қолданбалы оқыту құралдары мен платформаларына дейін (мысалы, Janymda, Qonzhyq App, Talkio AI). Жұмыста жекелендіру, интерактивтілік және автоматтандырылған кері байланысты қоса алғанда, тілдерді оқытуда генеративті ЖИ-ді қолданудың педагогикалық қағидаттары жүйеленген. Осы қағидаттар негізінде қолданыстағы қазақстандық қосымшалардың функционалдығы мен педагогикалық әлеуетіне сыни баға берілген.

Зерттеудің негізгі қорытындылары Қазақстанда ресурстары аз тілдерге арналған жаһандық сын-қатерге жауап беретін, мемлекеттік және корпоративтік деңгейде қолдау табатын бірегей ЖИ инфрақұрылымы қалыптасқанын көрсетеді. Қолданыстағы қосымшалар оқушылардың ынтасы мен белсенділігін арттыра отырып, негізгі дидак-тикалық функцияларды сәтті жүзеге асырады. Алайда, іргелі модельдердің технологиялық әлеуеті мен қолданбалы шешімдердегі қазіргі жүзеге асырылуы арасында, әсіресе терең бейімделгіш жекелендіру және мәдени ерекше-ліктерді жеткізу саласында алшақтық бар. Қорытындылай келе, бұл технологияларды мақсатты дамыту және педагогикалық тұрғыда сауатты енгізу жаһандық цифрлық кеңістікте қазақ тілінің мәртебесін сақтау, насихаттау және арттыру үшін ауқымды мүмкіндіктер ашатыны атап өтілді.